Музычны конкурс “Заспявай.BY”

 

 

У 2014 года фонд “Вяртанне” сумесна з парталам Tuzin.fm арганізаваў музычны конкурс маладых выканаўцаў “Заспявай.BY”. Яго мэта — заахвоціць маладых выканаўцаў звяртацца да беларускай мовы і паэзіі ў сваёй творчасці. Штогод з’яўляюцца новыя намінацыі (“Беларускі кавер”, “Замежны пераклад”), але заўжды застаецца адна пастаянная – “Спяваная паэзія”: выканаўцы кладуць на музыку беларускамоўны верш айчыннага паэта.

Пераможцаў вызначае журы, якое штогод змяняецца.

Лаўрэаты конкурсу атрымліваюць магчымасць выступіць у Мінску з канцэртам, а таксама каштоўныя прызы, у тым ліку грашовыя.

У 2017 годзе чарговы сезон конкурсу стартаваў у новым фармаце — «Заспявай-4x4». На гэты раз будзе толькі адна намінацыя — «Спяваная паэзія». З усіх пададзеных заяваў журы адбярэ 4 фіналісты. З кожным з гэтых выканаўцаў (гуртоў) будзе працаваць свой ментар. З улікам атрыманых ведаў кожны фіналіст будзе дапрацоўваць конкурсную песню пры падтрымцы свайго ментара і запіша яе ў студыі. Увосень адбудзецца прэм’ера чатырох студыйных песень фіналістаў «Заспявай-4x4». Таксама для кожнага з фіналістаў будзе зладжаны «выпускны канцэрт» пры падтрымцы вядомага беларускага гурта. Імя пераможцы назавуць на фінальным канцэрце праекта, які пройдзе не пазней за 1 лістапада 2017 года.

 

Пераможцы папярэдніх гадоў

2014

Прыз уручаўся ў намінацыі «Спяваная паэзія». Уладальнікам Гран-пры стаў Віталь Варанко за песню «Вяртайся!» на словы Віталя Рыжкова. Лаўрэатамі сталі Лізавета Леўчык за песню «Адзінота» на верш Таццяны Сапач і Юры Касцень (SP Kava) за песню «Эндшпіль» на верш Андрэя Адамовіча.

2015

Прыз уручаўся па дзвюх намінацыях — «Спяваная паэзія» і «Кавер». Уладальнікам Гран-пры стаў гурт Navi за песню «Плакалі ветры» на словы Паўлюка Труса ў намінацыі «Спяваная паэзія» і за песню «Жар-птушка» ансамбля «Сябры» (словы Генадзя Бураўкіна, музыка Эдуарда Ханка) у намінацыі «Кавер». Лаўрэатамі сталі Марына Вярэніч за песню «Чаму мы стрэліся не ў час?» на верш Таццяны Дзям’янавай у намінацыі «Спяваная паэзія» і Яўген Цярэнцьеў (гурт Teleport) за песню «Зачараваная» ансамбля «Песняры» (словы Генадзя Бураўкіна, музыка Ігара Лучанка) у намінацыі «Кавер».

2016

Прыз уручаўся ў трох намінацыях — «Спяваная паэзія», «Кавер» і «Замежны пераклад». У «Спяванай паэзіі» перамагла Pauline з песняй на верш Ірыны Багдановіч «Людзі, дзе вы?». У намінацыі «Беларускі кавер» найлепшым прызналі гурт Leibonik за арыгінальную інтэрпрэтацыю хіта гурту «Мроя» — «Я рок-музыкант». У намінацыі «Замежны пераклад» не было роўных беларускай версіі хіта Эраса Рамацоці ў перакладзе Мікіты Найдзёнава і ў выкананні Дзмітрыя Нікановіча і Вольгі Сацюк.

2017

Перамогу атрымаў гурт Helious, які запісаў песню "Па неадступнасці" на словы паэткі Ніны Лістоты. Журы ацэньвала фіналістаў на падставе іх развіцця цягам усёй адукацыйнай сесіі. Да канца 2017 года Helious пад кіраўніцтвам рэжысёра Арцёма Лобача здыме і прэзентуе кліп на конкурсную песню.