Абвешчанае журы прэміі “Дэбют”

Павел Бераговіч падчас уручэння прэміі "Дэбют" у 2015 годзе.

Сёлета ў журы прэміі ўвайшлі:


Павал Бераговіч — старшыня фонду “Вяртанне”, фундатар прэміі;
Уладзь Лянкевіч — паэт, перакладчык, музыка, лаўрэат прэміі “Дэбют” у 2013 годзе;
Віктар Марціновіч — пісьменнік, мастацтвазнаўца, лаўрэат прэміі “Дэбют” у 2011 годзе;
Юлія Мацук — загадчыца культурна-адукацыйнага аддзела Літаратурнага музея Максіма Багдановіча;
Антон Рудак — паэт, фіналіст прэміі “Дэбют” у 2014 годзе;
Віталь Рыжкоў — паэт, перакладчык, лаўрэат прэміі “Дэбют” у 2010 годзе;
Наталка Харытанюк — празаік, эсэістка, лаўрэатка прэміі “Дэбют” у 2010 годзе.

Пераможцы прэміі ў кожнай з намінацыяў атрымаюць чэк ад Фонду “Вяртанне” на суму, эквівалентную 2000$ паводле курсу Нацыянальнага банка РБ. Аўтары, чые кнігі зоймуць другое і трэцяе месцы ў сваіх намінацыях, атрымаюць узнагароды, эквівалентныя 500$ паводле курсу Нацыянальнага банка РБ. 

Для ўдзелу ў конкурсе трэба да 31 студзеня 2016 года запоўніць форму на сайце. Таксама заяўку можна накіраваць на электронную скрыню ці на паштовы адрас: 220005, Мінск, вул. Залатая Горка, 2-101. Да заяўкі трэба далучыць электронную версію кнігі, а таксама перадаць на офіс Беларускага ПЭН-цэнтра (Мінск, вул. Залатая Горка, 2-101) 2 асобнікі кнігі. 

Прэмія была заснаваная ў 2010 годзе і прысуджаецца штогод за найлепшую дэбютную папяровую ці электронную кнігу, напісаную на беларускай мове ці перакладзеную на яе, аўтару або перакладчыку ва ўзросце да 35 гадоў на момант выдання кнігі. “Дэбют” ушаноўвае маладых аўтараў, што пішуць у жанрах, у якіх працаваў Максім Багдановіч, і ўручаецца ў намінацыях “Проза”, “Паэзія”, “Мастацкі пераклад”.

Арганізатары прэміі: Саюз беларускіх пісьменнікаў, Беларускі ПЭН-цэнтр і дабрачынны фонд “Вяртанне”.

Фонд "Вяртанне"