Прыём заявак на "Заспявай 4х4" працягнуты да 17 мая

Cвае песні на словы беларускіх сучасных паэтаў маладыя беларускія выканаўцы могуць падаць да 17 мая. Найлепшых чакае навучальная сесія, праца ў студыі, канцэрты, грашовы прыз і здымкі кліпа.

На чацвёрты конкурс «Заспявай 4x4» прымаюцца заяўкі ад музыкаў 18-30 гадоў, якім прапануецца абраць верш сучаснага паэта, напісаны ў апошнія 30 гадоў, ды пакласці яго на сваю музыку. «Мы хочам злучыць сучасную паэзію і музыку ў адзінае цэлае. З аднаго боку адкрыць для маладых музыкаў свет беларускай сучаснай паэзіі, а з другога паспрыяць таму, каб добрыя вершы сталі песнямі», – заяўляюць арганізатары конкурсу, які ладзяць інтэрнэт-партал TuzinFM.by і дабрачынны фонд «Вяртанне» пры падтрымцы кампаніі «Будзьма беларусамі!». . 

Тэрмін прыёму заявак вырашана працягнуць да 17 мая. З усіх пададзеных заявак на мэйл konkurs.zaspiavaj@gmail.com журы адбярэ 4 фіналісты. Іх чакае навучальная сесія з лекцыямі, майстар-класамі ды практычнымі заняткамі, праца над конкурснай песняй у студыі, справаздачны канцэрт пры падтрымцы вядомага выканаўцы. Пераможца конкурсу атрымае грашовы прыз у 1000 BYN (каля 500 еўра), а на яго конкурсную песню рэжысёр Арцём Лобач здыме кліп.

Адбыліся змены ў складзе ментараў і журы конкурсу. З фіналістамі будуць працаваць лідар гурту Vuraj і кіраўнік «Спеўнага Сходу» Сяргей Доўгушаў, лідар «Палацу» і выкладчык Алег Хаменка, саўнддызайнер, лідэру гурта CherryVata і кіраўнік лэйблу «Ezhevika» Зміцер Літвіновіч ды саўндпрадусар і кіраўнік студыі «Central Station» Андрэй Акатаў. Да журы таксама далучацца арганізатары конкурсу Сяргей Будкін і Павел Бераговіч.

Падрабязьней пра ўмовы конкурсу – тут.

Песні пераможцаў і лаўрэатаў конкурсу  мінулых гадоў.