Выйшаў другі нумар гадавіка “Вілейскі павет”

“Вілейскі павет” (выдавец Андрэй Янушкевіч) — гэта зборнік публікацый, прысвечаных найперш канкрэтнаму рэгіёну: сучаснаму Вілейскаму раёну і тэрыторыям, якія ў розныя часы ўваходзілі ў межы Вілейскага староства, Вілейскага павета, Вілейскай вобласці. Матэрыялы таксама закранаюць і гісторыю сумежных раёнаў.

“Чарговы выпуск “Вілейскага павета” адлюстроўвае гісторыю краю на працягу вялікага часу. Хаця найперш гэта ХХ стагоддзе — час, сведкамі якога мы самі былі. Падрабязна апісваецца гісторыя мястэчка Даўгінава і ваколіц. Па-беларуску публікуецца кніга ўраджэнца гэтага кутка (вёска Мікуліна) Францішка Сяліцкага “Даўгінаўска-будслаўска-крывіцкі рэгіён на даўняй Віленшчыне (гістарычная хроніка)”. Прайшоўшы праз высылку ў Сібір і вайну, ён выехаў у Польшчу, дзе стаў прафесарам філалогіі. І ўвесь час пісаў пра сваю бацькаўшчыну. Пацвярджэннем таму і перакладзеная кніга. Па-польску яна вядома хіба адмыслоўцам, але не шырэйшаму колу чытачоў (пераклаў яе Міхаіл Гіль)”, — адзначаюць укладальнікі кнігі. У гадавіку таксама друкуецца шэраг біяграфічных матэрыялаў пра польскага прафесара.

Гісторык літаратуры Віктар Жыбуль апублікаваў у гадавіку тэкст Вульфа Сосенскага, аўтара газеты “Наша Ніва” пачатку ХХ ст., які выявіў у архіве. “Версіі і легенды. Гутаркі пра беларускага паэта Ф.К. Багушэвіча” — гэта паўміфічныя гісторыі пра Францішка Багушэвіча і вілейскіх паўстанцаў 1863 года. У гэтым тэксце чытач знойдзе шмат дэталяў дарэвалюцыйнага жыцця ў мястэчку Даўгінава і ваколіцах. Сам В. Жыбуль напісаў і грунтоўны артыкул пра Сосенскага. Гэта сябра Змітрака Бядулі. Менавіта Сосенскі падштурхнуў пісьменніка звярнуцца ў беларускамоўную газету са сваімі творамі. Так пачалася яго “кар’ера” ў беларускай літаратуры.

Сярод аўтараў гадавіка — Аляксандр Зайцаў, Анатоль Капцюг, Валянцін Анціпенка, Сяргей Макарэвіч, Тэлесфар Позняк, Вацлаў і Ірэна Сяліцкія.

Першы выпуск “Вілейскага павета” выйшаў у 2014 годзе. Ідэя выдання палягае ў тым, каб даць друкаваную пляцоўку для абмену матэрыяламі краязнаўцам, прафесійным гісторыкам, музейшчыкам па Вілейшчыне. Пошукі і знаходкі, радаводы, уражэнцы і тыя, хто тут жыў, паўстанні і войны. Гэта не толькі публікацыя новых арыгінальных тэкстаў, але і пераклад на беларускую мову даследаванняў, цэлых кніг з замежных моў, прысвечаных акрэсленаму рэгіёну. Публікуюцца ўспаміны, архіўныя дакументы, лісты, дзённікі.

Укладальнікі гадавіка — Сяргей Макарэвіч і Дзяніс Канецкі.

 Выданне выходзіць пры падтрымцы дабрачыннага фонду “Вяртанне”.

Фонд "Вяртанне"